YouTube copyright claim kaise hataye: apne hi gaane par claim aaye to kya karein
By the SUF Digitals team · Updated
Apne hi gaane par YouTube copyright claim aaye to ghabraiye mat. Zyadatar ye Content ID hota hai: aapka gana release ke baad Content ID mein gaya, aur YouTube ko nahi pata ki video aapne hi daala hai. Iska ilaaj hai apna channel allowlist karwana, jo ek request se ho jaata hai. Claim strike nahi hota, aur aapka channel safe rehta hai.
Apne gaane par claim kyun aata hai
Jab distributor aapka gana YouTube Content ID mein daalta hai, YouTube us recording ka fingerprint rakh leta hai aur har naye video se milata hai. Content ID awaaz pehchanta hai, insaan nahi. Isliye aapka official video, lyrical video ya live clip bhi kisi aur ke video ki tarah claim ho jaata hai.
Claim se video delete nahi hota. Bas us video ki ad wali kamai claim karne wale ko jaati hai. SUF ke saath wo paisa aapke plan ke share ke baad royalty statement mein aata hai, channel mein nahi. Allowlist karwane se claim band ho jaate hain, aur agar aapka channel YouTube Partner Program mein hai to video ki ad wali kamai phir aapke channel ko milti hai.
Claim aur strike mein farq
| Kya dikh raha hai | Matlab | Kya karein |
|---|---|---|
| Copyright claim (Content ID) | Automatic match. Video chalta rehta hai, bas kamai claim wale ko jaati hai ya kuch deshon mein block hota hai. | Claim aapke distributor ka hai to channel allowlist karwaiye aur claim release karwaiye. |
| Copyright strike | Kisi ne legal removal request bheji. Video hat jaata hai; teen active strike par channel band ho sakta hai. | Request galat hai to YouTube Studio se counter notification bhejiye. |
| Kisi anjaan company ka claim | Koi aur kehta hai ki recording uski hai. | Saboot ke saath dispute kijiye aur distributor ko bataiye. |
Apne channel se claim kaise hataye: step by step
- YouTube Studio mein Content kholiye, Restrictions column mein claim dekhiye aur claim karne wale ka naam note kijiye.
- SUF portal mein Support kholiye aur YouTube Content ID claim chuniye.
- Allowlist a channel chuniye, My own channel select kijiye aur apne channel ka link daaliye.
- Jo videos pehle se claim ho chuke hain, unke liye Release the claim on specific videos chunkar video links daaliye.
- Producer, featured artist ya kisi aur channel ko aapne permission di hai to uska channel bhi allowlist karwaiye.
- Allowlist hone ke baad naya video upload kijiye aur YouTube Studio mein check kijiye.
Kisi aur ne aapke gaane par claim kiya to
- Kisi ne aapka gana doosre distributor se dobara release kar diya aur Content ID mein daal diya. Support mein Copyright claim on your song form se video link aur claim karne wale ka naam bhejiye.
- Lease wali beat. Non-exclusive beat kai artists ko bikti hai, aur koi ek use Content ID mein daal de to sabke gaane claim hote hain. Apna beat licence padhiye.
- Bhajan ya lok geet par claim. Paramparik gaane ke bol aur dhun public domain mein hote hain, aur YouTube public domain ko Content ID mein allow nahi karta. Aapki apni recording par galat claim aaye to public domain chunkar dispute kar sakte hain. Devotional music guide padhiye.
Dispute kaise karein
YouTube Studio mein claim kholkar Dispute dabaiye aur sahi wajah chuniye: original content, licence ya public domain. Do line mein saaf likhiye, jaise: 'Ye meri apni original recording hai, SUF Digitals se 12 March 2026 ko release hui. Master aur gaana dono mere hain.' Claim karne wale ke paas jawab dene ke liye 30 din hote hain; jawab na aaye to claim hat jaata hai.
Pehle saboot tayyar rakhiye: project files, stems, WAV file, composer aur lyricist ke saath agreement, aur release link. Samajh na aaye ki claim kisne kiya, to pehle humein bhejiye; galat dispute se baat strike tak pahunch sakti hai.
Bina copyright claim ke gana kaise upload karein
Apne gaane ke liye: pehle gana release kijiye, phir channel allowlist karwaiye, phir official ya lyrical video upload kijiye. Jo gana poori tarah aapka hai (na sample, na lease beat, na paramparik dhun), wo Content ID mein rahe to doosron ke videos se bhi kamai aapko milti hai.
Doosre ke gaane ke liye koi jugaad nahi hai. Speed badalna, pitch badalna, slowed ya reverb lagana Content ID se nahi bachata, aur gaana phir bhi malik ka rehta hai. Cover ke liye permission chahiye: cover song kaise release kare.
Aksar poochhe jaane wale sawaal
Kya copyright claim se mera channel band ho jaayega?
Nahi. Claim strike nahi hota aur channel par koi asar nahi padta. Bas us video ki kamai claim wale ko jaati hai.
Apne gaane ka claim aane par paisa kahan jaata hai?
Claim aapke apne gaane ke Content ID ka hai to wo paisa SUF ke royalty statement mein aapke plan ke share ke saath aata hai.
Allowlist kaun karta hai?
Jo company aapke gaane ka Content ID chalati hai, yaani aapka distributor. SUF par ye Support ke YouTube Content ID claim form se hota hai.
Purane distributor ka Content ID abhi bhi claim kar raha hai, kya karun?
Purane distributor se kahiye ki gaana apne Content ID se hataye aur claims release kare. Tab tak SUF par us gaane ko Content ID se bahar rakhiye, taaki do claim na takraayein.
Is guide ka English version hai?
Keep reading
Want this handled for your releases?
Plans are annual and priced in rupees, from Rs 999 a year.
See plans and pricing